Şirvan Şəhər İcra Hakimiyyətinin başçısının birinci müavini Samid Abıyev dünyasını dəyişib.
yasamal.tv xəbər verir ki, o, ötən gün uzun sürən xəstəlikdən sonra vəfat edib.
Qeyd edək ki, 2008-ci ildə avtomobil qəzasında S.Abıyevin iki oğlu, gəlini və azyaşlı nəvəsi, 2009-cu ildə isə yol qəzasında onun daha bir oğlu vəfat edib. (report.az)
Pişiklər COVID-19-a ən həssas heyvanlardır, buna görə də koronavirus üçün potensial dərmanların və peyvəndlərin təsirini sınamaq üçün perspektivli canlı modeli ola bilərlər.
yasamal.tv xəbər verir ki, bu barədə “İzvestiya” virusoloqlara istinadən xəbər verir.
“Pişiklərin koronavirusa qarşı yüksək həssaslığı onları preklinik sınaqlar üçün yaxşı model halına gətirir”, – Novosibirsk Dövlət Universitetinin biotexnologiya və virusologiya laboratoriyasının müdiri, Rusiya Elmlər Akademiyasının müxbir üzvü Sergey Netesov deyib.
Alim onları yeni patogen üçün mümkün ötürmə bağlantısı olan və insanda COVID-19 xəstəliyini təqlid edən heyvan modeli kimi öyrənməyə başlamağı təklif edir.
Tümen Dövlət Universitetinin Biologiya İnstitutunun əməkdaşı Nikolay Karpovun sözlərinə görə, pişiklər antikor istehsalı baxımından patogenə həssasdırlar.
“Virusa həssaslıq və insanlara yaxınlıq baxımından pişiklər vaksinləri sınaqdan keçirmək üçün potensial obyekt hesab edilə bilər”, – deyə ekspert bildirib.
Mütəxəssisin fikrincə, gələcəkdə aparılacaq tədqiqatlar digər heyvanların da koronavirus infeksiyasına həssas olduğunu göstərəcək. (oxu.az)
Bütün ölkələr yayda pandemiyanın öhdəsindən gələ bilməyəcəyi təqdirdə, noyabr ayında koronavirus infeksiyalarının yeni dalğası başlaya bilər.
“Report” “RİA Novosti”yə istinadən xəbər verir ki, bu barədə Şanxayın “Huaşan” xəstəxanasının yoluxucu xəstəliklər şöbəsinin müdiri Çjan Venhun bildirib.
“Noyabr ayından sonra ciddi problemlə qarşılaşa bilərik. Hesab edirəm ki, epidemiyanın növbəti dalğası təxminən noyabrda başlaya bilər”, – o deyib.
Həkimin sözlərinə görə, Cənubi Amerika, Afrika və Cənub-Şərqi Asiyada da koronavirusun yayılması qeydə alındığından yay aylarında pandemiyanın tamamilə aradan qaldırılacağının qeyri-mümkün olduğunu təxmin etmək olar.
“Qış gələndə hamı yenə evdə qalacaq”, – həkim xəbərdarlıq edib.
Bununla belə, Ç.Venhunun sözlərinə görə, bir çox ölkədə infeksiyanın diaqnostikası sahəsində qazanılmış təcrübə sayəsində koronavirusun növbəti dalğası o qədər də böyükmiqyaslı olmayacaq.
“Amma tibbi resursları kifayət qədər olmayan ölkələr, məsələn, Afrika və Cənubi Amerika dövlətləri üçün növbəti qışda çətinliklər olacaq”, – həkim söyləyib.
O qeyd edib ki, dünyada epidemioloji vəziyyətə nəzarət məhz bu bölgələrin ölkələrindən asılıdır.
Qubada karantin rejimini pozan şəxslərdə narkotik vasitə də aşkar edilib.
Daxili İşlər Nazirliyinin mətbuat xidmətinin Quba regional qrupundan verilən məlumata görə, Bakı şəhər sakinləri olan Murad Quliyev və Mustafa Əsgərov sonuncuya məxsus “Hyundai H-1” markalı nəqliyyat vasitəsi ilə Bakı-Quba istiqamətində hərəkət edən zaman xüsusi karantin rejimi ilə əlaqədar olaraq Şabran rayonu Gəndov kəndi ərazisində quraşdırılmış müvəqqəti stasionar postda Şabran Rayon Polis Şöbəsinin əməkdaşları tərəfindən saxlanılıblar. Məlum olub ki, həmin şəxslər ərzaq almaq üçün 2 saatlıq icazə alaraq istirahət etmək məqsədi ilə şimal bölgəsinə gəlmək istəyiblər.
Onların barəsində İnzibati Xətalar Məcəlləsinin müvafiq maddəsi ilə protokol tərtib edilərkən hər iki şəxs özlərini şübhəli apardıqları üçün onların üzərilərinə və nəqliyyat vasitəsinə baxış keçirilib. Bu zaman həmin nəqliyyat vasitəsində gizlədilən saxlanılan şəxslərə məxsus ümumilikdə üç kibrit qutusunda narkotik maddə olan qurudulmuş marixuana aşkarlanaraq götürülüb.
Dindirilmə zamanı Murad Quliyev və Mustafa Əsgərov həmin narkotiklərin onlara məxsus olduğunu etiraf ediblər.
Faktla bağlı araşdırma aparılır. (apa)
“Barselona” futbol klubunun argentinalı oyunçusu Lionel Messi koronavirus pandemiyası zamanı işləyən tibb işçilərinə təşəkkür edib.
yasamal.tv xəbər verir ki, bu barədə L.Messi öz “Twitter” səhifəsində yazıb.
Argentinalı futbolçu bildirib: “Dünən tibb işçilərinin günü idi. Mən UNİSEF ilə birlikdə onlara gördüklərə işlərə görə minnətdarlığımı bildirmək istəyirəm. Bizim koronavirusdan qorunmağımız üçün gecələri və gündüzləri ailələrindən uzaqda keçirən qəhrəmanlar”.
Qeyd edək ki, Con Hopkins Universitetinin məlumatına əsasən, dünyada koronavirusa 1,8 milyondan artıq insan yoluxub, 110 mindən artıq insan isə ölüb.
Koronavirusun yayılmağa başladığı vaxtdan zəncəfilə olan tələbat kəskin artıb və nəticədə, bitkinin qiyməti bahalaşıb.
yasamal.tv xəbər verir ki, Samara Araşdırma və Dietoterapiya İnstitutunun direktoru, tibb elmləri doktoru Mixail Ginzburq immuniteti gücləndirən digər vasitələr barədə məlumat verib.
Ekspert qeyd edib ki, zəncəfil orqanizmin müdafiəsini artıran və profilaktikasını həyata keçirən təsirli vasitə olsa da, yeganə məhsul deyil.
Onun fikrincə, soğan, sarımsaq, qırmızı turp, kələm bakteriyaları öldürən və inkişafına mane olan fitonsidlərlə zəngindir.
“Sarıkök, qarağat, qaragilə, mərcanı, moruq isə orqanizmdə iltihabı azaldan təsirli vasitələrdir”, – deyə M.Ginzburg əlavə edib. (Oxu.az)
“Ölkəmizdə tətbiq olunan karantin rejiminə uyğun olaraq 1915 nəfər Naxçıvan Muxtar Respublikasında nəzarətdə saxlanılır. Onlardan 229-u ölkəmizin digər bölgələrindən olan və muxtar respublikaya gələn şəxslərdir”.
yasamal.tv xəbər verir ki, bu barədə Naxçıvan Muxtar Respublikası Səhiyyə Nazirliyi məlumat yayıb.
Qeyd olunub ki, bu günə qədər 880 şübhəli şəxsdə test yoxlamaları aparılıb: “Təkrar test yoxlamalarının nəticələrinə əsasən 71 nəfərdə koronavirus (COVID-19) infeksiyasına yoluxma faktı qeydə alınıb. 1 nəfər sağalaraq evə buraxılıb, 1 nəfər isə vəfat etmişdir. Virus aşkarlanan digər 69 nəfərin müalicələri davam etdirilir. Ağırlaşma halları yoxdur”. (report.az)
Türkiyə Prezidenti Rəcəb Tayyib Ərdoğan Daxili İşlər naziri Süleyman Soylunun istefasını qəbul etməyib.
yasamal.tv xəbər verir ki, istefa məktubunu görən Ərdoğan Soylunun bu ərizəsini münasib hesab etmədiyi qeyd edib. “Daxili İşlər Nazirinin istefası qəbul olunmayıb, o, vəzifəsinin icrasına davam edəcək” – deyə məlumatda qeyd olunub.
Qeyd edək ki, DİN rəhbəri Türkiyənin 31 əyalətində iki günlük küçəyə çıxma qadağası qərarından sonra yaranan görüntülərə görə istefa verdiyini açıqlamışdı. Prezident Ərdoğan üçüncü dəfədir ki, Süleyman Soylunun istefa qərarını geri çevirib.
Yeni növ koronavirusla mübarizə tədbirləri çərçivəsində Türkiyənin 31 əyalətində 48 saat küçəyə çıxmaq qadağası bu gecədən etibarən bitir.
“Qafqazinfo” “Anadolu” agentliyinə istinadən xəbər verir ki, ümumilikdə 63 milyon 640 min nəfərin yaşadığı əyalətləri əhatə edən qərarı 24 min 88 nəfər pozub. Onlara qarşı inzibati tədbirlər görülüb.
Qadağa bitdikdən sonra əyalətlərdə bağlanan market və supermarketlər yenidən açılacaq.
Bununla belə, pandemiya səbəbindən küçələrə çıxmamaq tövsiyə edilib.
“Müğənnilərin əlinə şans düşüb. Biri eyvanda, digəri divanın üstündə mahnı oxuyur. Mahnı oxumaq, konsert vermək vaxtıdı? Hamı bilir ki, bu xəstəlik yayılıb. Hamı evdə qalmalı, əl sabunlanmalı, maska taxılmalıdı. Bunu hamı bilir də… İnsanlara kömək edin”.
yasamal.tv xəbər verir ki, bu sözləri müğənni Rəqsanə İsmayılova instaqramda canlı yayıma bağlanarkən qeyd edib.
Uzun illərdir Rusiyada yaşayan ifaçı həmkarlarının karantin rejimindəki fəaliyyətini tənqid edib. Rəqsanə qeyd edib ki, sənətçilər sosial yardıma ehtiyacı olanlara yardım göstərmirlər:
“14-15 min dollar toy pulunuzdan 1 qəpik də enmirsiz. İndi niyə camaata yardım etmirsiz? Qeyrətinizi göstərin! Mən artıq dostlarımdan pul istəməkdən, kömək üçün yalvarmaqdan utanıram. İnsanlarımız üçün bunu edirəm. Rusiyada yaşayan azərbaycanlıların vəziyyəti pisdir, çatdıra bilmirik.
Bu gün hər kəs bir olmalıdır. Niyə kor qalıb gözlərinizi yummusunuz? Milyon nəfər var ki, toylarında çıxış etmisiz. Zəng vurmaq çətindir? Hələ çətin vəziyyətdə instaqramda yemək görüntüləri paylaşırsız. Ərzaq yardımı kənara qalsın, burada körpə və uşaqlar var ki, koronavirusa yoluxanlarla bir evdə qalır”.
Qeyd edək ki, R. İsmayılova 893 ailəni ərzaq və qida ilə təmin edib. (qafqazinfo.az)
