Koronavirus 60 milyon insanı həddindən artıq yoxsulluğa salacaq.
Dünya Bankının Prezidenti David Malpass bu barədə xəbərdarlıq edib.
O, qlobal miqyasda iqtisadi böyümənin bu il 5 faiz azalacağını gözlədiyini bildirib.
Onun sözlərinə görə, bu, milyonlarla insanın iş yerlərini və biznesini itirməsinə və daha yoxsul ölkələrin də bunu hiss etməsinə səbəb olub:
“Dünyadakı milyonlarla insanın dolanışığı məhv edilib və səhiyyə sistemi gərgin vəziyyətə düşüb”.
“Təxmini hesablamalarımıza görə, 60 milyona qədər insanın “həddindən artıq yoxsulluğa” məruz qalması son üç ildə yoxsulluğun azaldılması ilə bağlı bütün irəliləyişlərin silinməsidir”, – deyə, Malpass xəbərdarlıq edib.
Dünya Bankı “həddindən artıq yoxsulluğu” gündə bir nəfərə 3 manat 23 qəpikdən (1.90 dollar və ya 1.55 funt sterlinq) az vəsaitlə yaşamaq kimi müəyyənləşdirir.
Vaşinqtonda yerləşən kreditor yoxsul ölkələrə böhrandan çıxmaq üçün 160 milyard dollar qrant və aşağı faizli kreditlər təklif edir. Malpass dünya əhalisinin 70 faizinin yaşadığı 100 ölkəyə artıq təcili maliyyə yardımının verildiyini açıqlayıb:
“Dünya Bankı böyük həcmdə resurslar təqdim etsə də, bu, kifayət deyil”.
O, kreditorların kasıb ölkələrə kredit təklifləri etməsinə qarşı acıqlı olduğunu da bildirib:
“Yavaş tempdən bir qədər acıqlıyam. Kommersiya kreditorları hələ də ən kasıb ölkələrdən ödənişlər alırlar. Ümumiyyətlə, daha sürətlə hərəkət etmək lazımdır”.
Dünya Bankı Beynəlxalq Valyuta Fondu (BVF) ilə birgə kasıb ölkələrin bu ilin sonuna qədər G20 üzvlərinə borclarının qaytarılması ilə bağlı bir sxem üzərində işləyib. Bu sxem kreditlərin ödənməsi üçün borc istəməyə imkan verir.
Eyni zamanda JP Morgan bankının icraçı direktoru Cami Dimon koronavirus pandemiyasının ədalətli cəmiyyət qurmaq üçün “oyanış çağırışı” kimi xidmət etməli olduğunu deyib:
“Ümid edirəm ki, bu böhrandan daha çox insan üçün, xüsusən çox uzun müddət geridə qalanlar üçün fürsət yaradan katalizator olaraq istifadə edərik”.(BBC Azərbaycan)
