Zərdabda toy, nişan, ad günləri və sair kimi şənlik mərasimlərinin COVID-19 təhlükəsi ilə əlaqədar tətbiq edilən məhdudiyyət tələblərinə uyğun keçirilməsinə nəzarət məqsədilə reyd keçirilib.

yasamal.tv qanunla.az-a istinadən xəbər verir ki, təşkil olunan reyd İcra Hakimiyyəti başçısı aparatının və rayon polis şöbəsinin əməkdaşlarının iştirakı ilə keçirilib. Reyd zamanı Zərdab rayon Qoruqbağı kənd ərazisində fəaliyyət göstərən “ELDAYAQ” şadlıq sarayında vaksinasiya ilə əlaqədar yoxlama aparılıb, habelə maarifləndirmə işləri görülüb. Şadlıq saraylarında məclisə gələn 150 nəfərin vaksinasiya olunmaq barədə sənədinə baxılıb. 44 nəfər peyvənd olunmadığı üçün geri qaytarılıb və xəbərdarlıq olunub.Rayon icra hakimiyyətinin əməkdaşlarının göstərişi ilə bəy və gəlin həmin gün peyvənd olunub bir-başa şadlıq sarayına gəliblər.

Qeyd edək ki, rayon icra hakimiyyətində yaradılan operativ qərargahın üzvləri tərəfindən şadlıq saraylarında və həyətlərdə təşkil olunan məclislərə mütəmadi olaraq nəzarət olunur. Keçirilən reydlərin əhalinin sağlamlığına və təhlükəsizliyinə xidmət etməsi sakinlər tərəfindən razılıqla qarşılanır.