Ukrayna prezidenti Vladimir Zelenski koronavirus vaksinini ixtira edənə külli müdarda pul mükafatı vəd edib.

“Report” “Sol sahil” nəşrinə istinadən xəbər verir ki, bu barədə Səhiyyə nazirinin müavini, ölkənin baş sanitar həkimi Viktor Lyaşko bildirib.

O, qeyd edib ki, dövət başçısı COVID-19 infeksiyasını ixtira edənə 1 milyon ABŞ dolları verəcək.

“Sizə sirr açacam. Prezident məndən bizim akademiklərimizə məktublar yazmağı xahiş etdi. Dövlət başçısı söz verdi ki, əgər kimsə (COVID-19 -red) vaksini və ya dərmanı ixtira etsə, o, azı 1 milyon ABŞ dolları mükafat alacaq. Ancaq bilmirəm hansı fonddan”, – Lyaşko “Sol sahil” nəşrinə bildirib.

O həmçinin qeyd edib ki, ölkədə epidemiologiya ilə bağlı vəziyyət optimist ssenari üzrə inkişaf edir, proqnozlara görə, pandemiya müddətində əhalinin 2%-dən azı virusa yoluxa bilər.

Ukraynanın Səhiyyə Nazirliyinin 12 aprelə olan məlumatına görə, ölkədə COVID-19-a 2 777 yoluxma qeydə alınıb, 83 nəfər ölüb, 89 pasiyent sağalaraq xəstəxanalardan evə buraxılıb.

Xatırladaq ki, koronavirus ilk dəfə ötən ilin sonlarında Çinin Uhan şəhərində qeydə alınıb.

Ümumdünya Səhiyyə Təşkilatı (ÜST) martın 11-də COVID-19 infeksiyasını pandemiya elan edib. ÜST-ün son məlumatlarına görə, dünyada artıq demək olar ki, virusa 1,7 milyondan çox yoluxma qeydə alınıb, 105 mindən artıq insan pandemiyanın qurbanı olub.

Bütün ölkələr yayda pandemiyanın öhdəsindən gələ bilməyəcəyi təqdirdə, noyabr ayında koronavirus infeksiyalarının yeni dalğası başlaya bilər.

“Report” “RİA Novosti”yə istinadən xəbər verir ki, bu barədə Şanxayın “Huaşan” xəstəxanasının yoluxucu xəstəliklər şöbəsinin müdiri Çjan Venhun bildirib.

“Noyabr ayından sonra ciddi problemlə qarşılaşa bilərik. Hesab edirəm ki, epidemiyanın növbəti dalğası təxminən noyabrda başlaya bilər”, – o deyib.

Həkimin sözlərinə görə, Cənubi Amerika, Afrika və Cənub-Şərqi Asiyada da koronavirusun yayılması qeydə alındığından yay aylarında pandemiyanın tamamilə aradan qaldırılacağının qeyri-mümkün olduğunu təxmin etmək olar.

“Qış gələndə hamı yenə evdə qalacaq”, – həkim xəbərdarlıq edib.

Bununla belə, Ç.Venhunun sözlərinə görə, bir çox ölkədə infeksiyanın diaqnostikası sahəsində qazanılmış təcrübə sayəsində koronavirusun növbəti dalğası o qədər də böyükmiqyaslı olmayacaq.

“Amma tibbi resursları kifayət qədər olmayan ölkələr, məsələn, Afrika və Cənubi Amerika dövlətləri üçün növbəti qışda çətinliklər olacaq”, – həkim söyləyib.

O qeyd edib ki, dünyada epidemioloji vəziyyətə nəzarət məhz bu bölgələrin ölkələrindən asılıdır.